Në Kosovë po shtohet trafikimi i njerëzve

Mitrovicë – Nga paslufta në Kosovë kanë ndodhur 139 raste të trafikimit të njerëzve, është thënë të martën në një debat në Mitrovicë, të organizuar nga OJQ “Mundësia” në kuadër të një fushate kundër trafikimit. Kjo fushatë është duke u mbështetur nga IOM-i, Qeveria finlandeze, Zyra e kryeministrit për qeverisje të mirë dhe linja telefonike e ndihmës. Sevme Baruti, nga Departamenti i Drejtësisë, ka theksuar se në rajonin e Mitrovicës janë trafikuar pas lufte 8 persona, prej tyre 6 vendës dhe dy ndërkombëtar. Ajo ka elaboruar një rast të trafikimit të dy vajzave të cilat për shkak të kushteve të vështira materiale kanë pranuar të punojnë si kameriere e më pas janë detyruar të merren edhe me prostitucion. Sipas saj, viktimave iu është siguruar strehim, e në rastet e ndërkombëtarëve edhe kthimi në vendet e tyre prej nga janë trafikuar. Florenta Beqiri ka elaboruar legjislacionin, i cili është duke iu kundërpërgjigur trafikantëve dhe të trafikuarve. “Pas përfundimit të luftës viktimat e trafikimit ishin kryesisht nga Evropa Lindore, ndërsa tani kur është duke u zhvilluar një luftë kundër trafikimit në këtë pjesë të Evropës parametrat kanë ndërruar. Tani në Kosovë, kryesisht të trafikuar janë nga brenda dhe numri i tyre për çdo ditë fatkeqësisht po rritet”, ka thënë Safet Kamberi nga KK-ja. Rreshterja e SHPK-së, Zylë Ferataj, ka theksuar se ka shtim të të trafikuarave vendase.

Komentet e përdoruesve

Nuk ka komente.

 Version i printueshëm