MKOE - një ndihmë e madhë për lëvizjen mjedisore në Shqipëri

Milieukontakt Oost-Europa (MKOE) është një Organizatë Hollandeze e pavarur, e themeluar në 1988. Objektivi i Milieukontatit është fuqizimi i OJF-ve mjedisore të Evropës Lindore dhe Qendrore dhe të Republikave të reja që ato të ndikojnë në politikat mjedisore të shoqërive të tyre. Milieukontakt u ofron organizatave mjedisore mbështetje dhe këshillime, duke nxitur dhe krijuar bashkëpunime mes organizatave mjedisore holandeze dhe vendeve të lartpërmendura. Në vijim mund të lexoni intervistën me Znj. Valbona Mazreku, përfaqësuese e Milieukontakt Oost-Europa në Shqipëri dhënë për OneWorld Platformën për Evropën Juglindore. Valbona Mazreku, përfaqësuese e Milieukontakt Oost-Europa, Shqipëri OW EJL: Që prej sa kohësh e ka filluar aktivitetin organizata, si dhe cili ka qenë qëllimi kryesor i saj? Valbona Mazreku: Milieukontakt Oost Europa është aktiv në Shqipëri që nga viti 2000. Ka zbatuar 2 projekte dhe tashmë është duke zbatuar projektin: “Në mbështetje të lëvizjes mjedisore shqiptare”. Qëllimi i përgjithshëm i Milieukontaktit është organizimi i një lëvizje mjedisore demokratike dhe aktive; një lëvizje të qëndrueshme dhe me ndikim në komunitet; një lëvizje të dukshme dhe të pranishme në media; një lëvizje pjesëmarrëse në politika dhe vendimmarrje. OW EJL: Cilat janë drejtimet kryesore të punës suaj? Valbona Mazreku: Integrim – Problemet mjedisore janë shpesh të lidhura me një gamë të gjerë problemesh sociale. Aktorë kryesorë nga sfera të ndryshme të shoqërisë duhet të kërkojnë së bashku zgjidhje që kontribuojnë për një mënyrë jetese të qëndrueshme. Parimet e demokracisë – Të përfshijë të gjitha palët në proces, ku aktorët kryesorë duhet të kenë mundësinë e pjesëmarrjes në dialog. Kjo garanton atë që problemet shihen si shqetësime të përbashkëta që lypin zgjidhje të përbashkëta. Strategji kombëtare, zbatim vendor – Bazuar në idetë dhe planet në nivel kombëtar, nevojitet të krijohet një strategji e përgjithshme. Delegimi i detyrave dhe përgjegjësive në nivel vendor do të lehtësojë efektivitetin dhe pranueshmërinë. Parimet e pronësisë – Kur nis ose mbështet struktura dhe mekanizma të reja që i shërbejnë lëvizjes mjedisore, Milieukontakt ka për qëllim kalimin gradual të pronësisë drejt OJF-ve. Për realizmin e një qëllimi kaq ambicioz Milieukontakt mendon se duhet një periudhe 10 vjeçare. Në filozofinë e Milieukontakt çdo lëvizje kalon nëpër katër stade: Shkrirje e shoqatave mjedisore - Zhvillim i brendshëm i tyre - zhvillim i rrjetëzimit dhe pjesëmarrja - lëvizje mjedisore e qëndrueshme. OW EJL: Nga përvoja dhe puna juaj e deritanishme, a mund të jepni një vlerësim për gjendjen e shoqatave mjedisore shqiptare në përgjithësi? Valbona Mazreku: Sot shoqatat mjedisore shqiptare ndodhen në fazën e dytë, por kanë disa elemente dhe të fazës së tretë. Tashmë, pasi ka kaluar gjysma e parë mund të krenohemi me disa fryte të punës sonë. Ende lëvizja mjedisore është e brishtë, por duket mjaft premtuese. Për këtë mjafton të përmendim disa beteja të nisura nga kjo lëvizje për të përballur disa nga sfidat e kohës në Shqipëri, si psh: zhvillimi i Lagunës së Nartës në një zonë Ramsar apo kërkime për naftë; ndërtimi i shkrumbatorit të plehrave në Kashar apo alternativat e tjera biologjike; parku energjetik në Vlorë apo zhvillimi i ekoturizmit në këtë qytet. Fitorja më e madhe e shoqatave mjedisore shqiptare (grupimit “Ekolëvizja”) përveç ndalimit të investimeve në ndonjë rast është edhe qenia e tyre palë në bisedime me qeverinë për vendosjen e politikave të rëndësishme zhvillimin e vendit. OW EJL: Cila është mbështetja që ju si organizatë i ofroni zhvillimit dhe forcimit të organizatave shqiptare? Valbona Mazreku: Milieukontakt ndihmon organizatat shqiptare nëpërmjet ofrimit të asistencës dhe këshillimeve për çështje të organizmit dhe menaxhimit si dhe për probleme të veçanta mjedisore. Ajo që Milieukontakt kërkon të përçojë është krijimi i kushteve dhe ofrimi i eksperiencës për organizatat shqiptare që ato të zhvillohen dhe profesionalizohen. Milieukontakt me mekanizmin e tij (zyrën lokale dhe ato në vende të tjera të rajonit) i është përgjigjur nevojave të vendit, të shoqatave (sipas shkallës së tyre të zhvillimit) duke dashur që çdo gjë të mbajë markën shqiptare, bile dhe në rastet e eksperiencave dhe përvojave nga vendet e tjera të rajonit është bërë adaptimi i tyre me realitetin dhe vetë zhvillimin e shoqërisë shqiptare. Vëmendje të veçantë në punën e tij Milieukontakt i ka kushtuar dhe zhvillimit të shoqatave që ofrojnë shërbime në fushën e trajnimeve, këshillimeve, edukimit mjedisor, mjeteve të komunikimit elektronik; fushatbërjeve, lajmeve mjedisore etj. Këto shoqata kanë krijuar një qendër mjedisore burimore të hapur për të gjitha shoqatat e tjera mjedisore.

Komentet e përdoruesve