GAK këmbëngulëse në kërkimin e saj për “Unionin”

Galeria e Arteve të Kosovës - GAK Drejtuesit e Galerisë së Arteve të Kosovës (GAK) si vazhdimësi e kërkimit të drejtës për objektin e ish-hotelit “Union” i cili gjendet në qendrën e ngushtë të kryeqytetit të Kosovës, dje (e hënë) kanë vënë një pano të pëlhurës afro katërmetërshe në objekt në të cilën paraqitet Rregullorja 2003/13 - Mbi Transformimin e së Drejtës për Përdorimin e Pronës së Patundshme Shoqërore. “Sipas Rregullores 2003/13 disa prona që janë nën menaxhimin e AKM-së mund të jepen me qira në kohëzgjatje sipas marrëveshjes, bile në Nenin 1 “AFATI” përmendet edhe mundësia e kësaj kohëzgjatjeje deri në 99 vjet. Ndërsa në Nenin 2 ceken edhe kushtet specifike të qirasë”, thuhet në kumtesën e lëshuar për media nga ana e GAK-ut. Panoja me rregulloren është vënë si kundërpërgjigje dhe reagim ndaj deklaratave të Kryeministrit të Kosovës, Bajram Kosumi sipas të cilit, “nuk ka bazë ligjore të ndalohet privatizimi i këtij hoteli” dhe pikërisht një ditë para mbledhjes së ardhshme të Qeverisë së Kosovës. Sipas Luan Mulliqit, drejtor i GAK-ut, “kjo është përgjigje ndaj atyre qeveritarëve që thonë se ky objekt nuk mund t’i mbetet kulturës meqenëse nuk ka bazë ligjore”.

Komentet e përdoruesve