Fushata kombëtare në mbrojtje të mjedisit

Gjatë muajit maj, Lëvizja Mjaft! do të angazhohet në një fushatë kombëtare në mbrojtje të mjedisit, duke synuar që të: (I) rrisë ndërgjegjësimin e qytetarëve dhe interesin e tyre mbi problemet e mjedisit; (II) të ndryshojë sjelljet e njerëzve dhe të nxisë qëndrime pozitive kundrejt ambjentit; (III) të mobilizojë komunitetet në ndërmarrjen e aksioneve vullnetare për të mbajtur pastër qytetet e tyre; (IV) të lehtësojë dialogun mes qytetarëve dhe institucioneve për të rritur pjesëmarrjen publike në vendim-marjen mbi çështjet e ambjentit. Për të arritur qëllimet e mësiperme, MJAFT ka planifikuar të implementojë këto aktivitete: - Karvani Kombëtar i Mjedisit që do të nisë në Tiranë për të udhëtuar në qytetet e Shkodrës, Rrëshenit, Peshkopisë, Durrësit, Pogradecit, Beratit, Vlorës, Gjirokastrës, Korçës dhe Fierit. - Forumet Publike në këto qytete mes autoriteteve lokale dhe qytetarëve mbi çështjet e ambjentit dhe përfshirjen e publikut në vendim-marrje. - Aksione publike në qytetet e mësiperme të cilat do t’i drejtohen një çështjeje mjedisore specifike për secilin nga qytetet. - Një fushate mediatike informuese, ndërgjegjesuese dhe mobilizuese për qytetarët, nëpërmjet spoteve, broshurave, fletëpalosjeve, artikujve, etj. Jemi të ndërgjegjshëm se një ndërmarrje e tillë kërkon përgjegjesi, por në të njëjtën kohë edhe ide të reja e gjetje origjinale. Pikërisht prandaj, kërkojme bashkëpunimin tuaj në këtë nisme të rëndësishme. Gjatë ditëve të ardhshme, dëshirojmë t’ju ftojmë të mendoni për këtë nismë. Do të jemi të lumtur të presim prej jush sugjerime për produktet që do të përdorim gjatë fushatës në mbrojtje të mjedisit. Nëse keni propozime rreth posterave, reklamave, fletëpalosjeve, motos apo risive të tjera që mund të përdorim, ju lutemi të na shkruani në info@mjaft.org Lër një shenjë në histori, përfshihu!

Komentet e përdoruesve