Filloi trajnimi për trajner në kuadër të projektit ‘Edukimi kundër korrupsionit’

Gjatë vikendit në lokalet e Qendrës për Arsim të Kosovës (KEC) ka filluar realizimi i projektit ‘Edukimi kundër korrupsionit’, projekt ky që ka për qëllim vetëdijesimin për format dhe mënyrat e shfaqjes së korrupsionit në arsim dhe shoqëri, sikurse edhe për strategjitë dhe mënyrat e luftimit të tij. Qendra për Arsim e Kosovës Fillimisht, 35 mësimdhënës të lëndëve Psikologji, Edukatë Qytetare, Gjuhë Shqipe, Histori, Lëndë Juridike, Sociologji e Filozofi, nga shkollat fillore dhe të mesme të të 7 regjioneve të Kosovës kanë vijuar pjesën e parë të trajnimit në kuadër të këtij projekti. Në këtë trajnim, përveç facilitatoreve vendor, mori pjesë dhe Virginija Budiene, profesoreshë nga Lituania. Gjatë trajnimit pjesëmarrësit u njoftuan më përkufizimin e termit korrupsion, format e paraqitjes se tij, shkaqet që sjellin deri te paraqitja e tij, si dhe strategjitë për luftimin e tij në shoqëri. Më vonë u prezantua tema: Korrupsioni dhe edukimi kundër korrupsionit, përmes së cilës pjesëmarrësit u njoftuan për format e paraqitjes së korrupsionit në arsim, kush janë përfituesit në këtë rast, viktimat, dhe çfarë duhet të ndërmerret për ta luftuar atë. Pjesë e veçantë e prezantimeve ishin mësimet model që iu paraqitën mësimdhënësve, për t'iu bërë të ditur atyre se si mund ta inkorporojnë idenë e luftës kundër korrupsionit në kurrikulumin e tyre lëndor. Përshtypjet e pjesëmarrësve dhe profesoreshës nga Lituania për përmbajtjen e mbarëvajtjen e programit të trajnimit, udhëheqjen e seancave dhe organizimin e trajnimit ishin jashtëzakonisht pozitive. Në gjysmën e dytë të muajit qershor do të mbahet pjesa e dytë e trajnimit për trajnerë në kuadër të këtij projekti, ku pritet që një numër i konsiderueshëm i pjesëmarrësve të suksesshëm të certifikohen si trajner. Trajnerët e certifikuar do të udhëheqin trajnimet që do të organizohen në rajonet e ndryshme të vendit në muajin shtator.