KMDLNJ kërkon angazhim maksimal për identifikimin e të pagjeturve

Prishtinë - Një ditë para Ditës Ndërkombëtare për Personat e Zhdukur, Këshilli për Mbrojtjen e të Drejtave e të Lirive të Njeriut - KMDLNJ, sot ka organizuar tryezën me temën “Intensifikimi i aktiviteteve për identifikimin e të pagjeturve”. Qëllimi i tryezës është identifikimi i hapave të mëtejmë për zbardhjen e fatit të tyre, ka thënë kryetari i KMLDNJ-së, Pajazit Nushi. Për dallim nga familjarët e personave të pagjetur, të cilët mendojnë se ende ka persona të gjallë në Serbi, KMDLNJ-ja nuk beson në këtë teori por kërkon nga institucionet vendore dhe ndërkombëtare angazhim maksimal për zbardhjen e fatit të tyre. Sipas të dhënave të Komitetit Ndërkombëtar të Kryqit të Kuq, rreth 2,500 persona konsiderohen të zhdukur, fati i të cilëve edhe shtatë vjet pas përfundimit të luftës në Kosovë mbetet i pandriquar.