Ndotja mban peng zhvillimin – Çdo gjë nis me një votim

Zgjedhjet vendore që po afrojnë do të jenë ndryshe në shumë drejtime. -Së pari ato do te jene te bazuara ne nje kod te ri elektoral. -Së dyti, si rezultat i proçesit të decentralizimit, pushtetet e zgjedhura vendore do të kenë shumë më tepër përgjegjësi të deleguara nga pushteti qendror dhe një gamë më të madhe përgjegjësish dhe detyrimesh për zgjidhjen e problematikave mjedisore vendore. Disa nga fushat e zgjerimit te pushtetit të autoriteteve vendore janë: ujësjelles- kanalizimet, planifikimi urban, mbrojtja dhe përmirësimi i gjendjes së mjedisit. Këto dy faktorë si dhe dëshira për të vendosur mjedisin në prioritetet e programeve elektorale dhe me pas atyre vendore u bënë nxitës në ndërmarrjen e nismës nga Ekolëvizja dhe Milieukontakt dhe për gjelbërimin e zgjedhjeve vendore. Qëllimi i kësaj nisme është që me rastin e zgjedhjeve vendore 2007 Ekolevizja të “Organizojë një fushatë publike jo-politike, jo-partizane dhe te rrisë ndërgjegjësimin e votuesve dhe kandidatëve mbi rëndësinë e mjedisit, shëndetit dhe zhvillimit të qëndrueshëm “ . Për realizimin e kësaj fushate, me mbështetjen e Milieukontakt është ngritur një grup pune me ekspertë në fushatëbërje, në media, në mjedis, në materiale informuese-edukuese dhe në qeverisjen vendore i cili do të ideojë, përgatisë dhe koordinojë fushatën në fjalë. Fushata do të konsistojë në organizimin e aktiviteteve të ndryshme dhe përgatitjen e publikimit të materialeve informuese-edukuese nga ana e Ekolëvizjes, të gjitha këto nën të njëjtën logo dhe mesazh. Kjo fushatë do të pasurohet nga shumë aktivitete të tjera në nivel vendor të organizuara nga vetë shoqatat anëtare të Ekolëvizjes dhe të tjera që janë të interesuara të marrin pjesë në fushatë.

Komentet e përdoruesve