Udha e mundimshme që shkronjat duhet të bëjnë…

Fondacioni “MJAFT” do të paraqesë ditën e premte, 27 tetor, në orën 18.00 në sallën “Black Box” të Akademisë së Arteve premierën e dokumentarit “Udha e Shkronjave”, sipas një ideje të z. Boiken Abazi. Një ide e guximshme, për të bërë një hap konkret në frenimin e analfabetizmit në zonat më të largëta të Shqipërisë, atje ku edhe ky “virus” mbijeton më gjatë, bëri që të rinj të mirëshkolluar, të linin gjithcka e të punonin me fëmijët dhe të rinjtë me kufizime ne arsim, përgjatë gjithë muajve të verës 2006. Ky projekt i fondacionit “MJAFT” lindi pas një analize të thellë që iu bë këtij problemi shokues për shoqërinë, që mbart statistika serioze që indikojnë se kemi të bëjmë jo vetëm me një problem në rritje, por fatkeqësisht edhe me një problem që për arsye të shumta mbahet i fshehtë… Një kamera mjeshtërore, nën regjinë e Mathew Todd Sheiderer dhe Boiken Abazit dhe me narrator Adi Krastën, paraqesin para jush jo vetëm imazhet e mrekullueshme të natyrës shpesh të egër dhe të virgjër të Shqipërisë, por edhe pamjet mbresëlënëse dhe të pafajshme të atyre mijëra të rinjve e fëmijëve shqiptarë që janë lënë të paafte per te lexuar e shkruar… Imazhe që nuk do t’i harroni lehtë, nga fshatrat më të thella të Peshkopisë, Fierit por edhe nga zonat informale të kryeqytetit… Imazhe që do t’ju bëjnë të mendoni seriozisht për një nga plagët më të mëdha të shoqërisë post-komuniste shqiptare… Jeni të ftuar të merrni pjesë në premierën e dokumentarit “Udha e Shkronjave” në sallën Black Box, Akademia e Arteve, ditën e premte, ora 18.00. Hyrja eshte e lire.

Komentet e përdoruesve