Ofendime për mbështetësit e bojkotit; OJQ-të kërkojnë nga organizatat ndërkombëtare të ndikojnë në Qeverinë e Serbisë

Iniciativa për bojkotimin e referendumit për kushtetutën e re të Serbisë - e filluar nga organizatat joqeveritare me seli në Vojvodinë - ka kërkuar nga autoritetet shtetërore të fillojnë hulumtimin ex-officio të incidentit që ka ngjarë në tubimin e së martës në Beograd, i cili ishte i shoqëruar me fyerje nacionale, të OJQ-ve dhe aktivistëve të partive politike që përkrahin bojkotin e referendumit. Të martën, më 24 tetor, Asociacioni i studentëve i Universitetit të Mitrovicës dhe Organizata rinore e Këshillit Nacional Serb për veriun e Kosovës kanë organizuar një tubim përkrahjeje për kushtetutën e re. Pjesëmarrësit e këtij tubimi kanë lëshuar një mori ofendimesh ndaj liderëve të partive politike dhe OJQ-ve që e mbështesin bojkotin, duke i quajtur ata “Shiptari” dhe duke iu dhënë edhe shpërblime fyese. Disa qindra qytetarë morën pjesë në këtë tubim që u mbajt në Sheshin e republikës në Beograd. Ata mbanin slogane si “Kosova është shpirti ynë – shpëtojeni shpirtin tonë”, ndërsa një mori pjesëmarrësish mbanin të veshur fanella me simbole të njësisë së shpërbërë për operacionet speciale (Beretat e Kuqe) dhe sloganin “Terrorizmi është sëmundje - thirreni doktorin”. Në këtë tubim kanë marrë pjesë edhe lideri i Këshillit Nacional Serb për Kosovë, Milan Ivanoviq, njëri nga liderët e serbëve të Kosovës, Marko Jakshiq, si dhe një prift i kishës ortodokse serbe nga Mitrovica, i cili nuk dëshiroi të tregonte identitetin e tij. Iniciativa për bojkotimin e referendumit e OJQ-ve nga Vojvodina ka apeluar tek opinioni ndërkombëtar që më vëmendje të posaçme të përcjellë ngjarjet në Serbi që kanë lidhje me referendum. "U bëjmë thirrje faktorëve ndërkombëtar që të shfrytëzojnë ndikimin e tyre tek Qeveria e Serbisë dhe që me kohë të parandalojnë nxitjen e mëtutjeshme të urrejtjes kombëtare, fetare dhe racore, para se të bëhet vonë dhe gjërat të dalin nga kontrolli”, shkruan në kërkesën e organizatave të mbledhur nën ombrellën e Iniciativës dërguar opinionit botëror. Në të njëjtën kohë këto organizata i kanë dërguar një letër edhe ambasadorit të SHBA-së në Serbi, Michael Polt, nëpërmjet se cilës kërkojnë nga ai që të shfrytëzojë ndikimin e tij te organizatat ndërkombëtare dhe te Qeveria e Serbisë, në mënyrë që të përkrahet përpjekja e qeverisë për t’u ruajtur paqja etnike dhe siguria për të gjithë qytetarët”. Në letër po ashtu theksohet se procesi kushtetutar në Serbi është i shoqëruar me përhapjen e urrejtjes nacionale, fetare dhe racore. "Fenomenet e tilla po intensifikohen, kërcënojnë me daljen nga kontrolli dhe paralajmërojnë pasojat e padëshirueshme në vijim për pakicat etnike e fetare në Serbi dhe për sigurinë e fytyrave publike të cilat kundërshtojnë hegjemonizmin etnik dhe përhapjen e ndjenjës anti-minoritare e sidomos asaj antishqiptare gjatë procesit të zgjidhjes së statusit të Kosovës”, thuhet më tutje në këtë letër. Iniciativa po ashtu ka akuzuar edhe televizionin shtetëror për promovimin e frymës jo-tolerante, mu sikur ka bërë në vitet para luftërave në ish-Jugosllavi.

Komentet e përdoruesve