“Çohu” shpallë Qeverinë e Kosovës, “Kampion të korrupsionit”

Me rastin 9 dhjetorit, Ditës ndërkombëtare kundër korrupsionit, Organizata për Demokraci, Antikorrupsion dhe Dinjitet - “Çohu” e ka shpallur qeverinë e Kosovës, “Kampion në Korrupsion”. Para dyerve të Qeverisë së Kosovës, aktivistët e kësaj organizate, të premten, kanë vendosur një kupë të stolisur me kartëmonedha. Organizata “Çohu”, e ka ndërmarrë këtë hap, pasi që sipas saj, krimi i organizuar dhe korrupsioni i kanë mbërthyer institucionet e Kosovës. Këtë gjë ata e mbështesin edhe me raportin e fundit të Komisioni Evropian. “Buxheti i Kosovës nuk është i qytetarëve të saj por i bosëve mbi-institucional. Këta bosë kontrollojnë Qeverinë e Kosovës dhe të gjitha institucionet e kompanitë prej nga fitojnë para në mënyrë të paligjshme!”, vlerëson kjo organizatë në vendimin e saj për ta shpallur Qeverinë e Kosovës, “Kampion të korrupsionit”, duke i numëruar edhe rastet kur janë keqpërdorur paratë e qytetarëve.

Komentet e përdoruesve